日皇盃撐FC東京

水戶蜀葵護級大過天
魚與熊掌不可兼得！日乙排緊尾四嘅水戶蜀葵，目前首要任務係護級，所以今日佢哋响日皇盃16強客戰日職勁旅FC東京，千祈咪寄望會爆冷，東京讓半一嘅1.73倍上盤先係正路之選。

（開賽時間：周三晚6:00）

水戶家陣嘅形勢唔算超級惡劣，因為日乙包尾嘅櫪木SC只得35分，已經神仙難救，來季肯定日丙再見。水戶現時最怕係畀尾二嘅大分三神（38分）追過，事關佢哋係就係Lead住大分5分，但係剩低嗰兩場波入面，先要對爭緊升班附加賽嘅札幌岡薩多，然後喺收爐戰遇着尾五嘅京都不死鳥，雖然水戶只要兩場波加埋攞2分經已甩身，不過都要人哋肯先得o架，札幌、京都要搶分o架喎！

5次對賽 東京全勝
正因為咁，水戶可以做嘅就係留番啖氣聯賽搶分，萬一盃賽去得太盡打殘一、兩件影響護級，咁就得不償失。何況佢哋咁耐以嚟5戰東京輸清光，擺明就唔係人哋嗰班，何必為咗個難過護級嘅盃賽搏命先？

當然，今季以爭標做目標嘅FC東京，呢場波少咗3件主力，包括一對中堅森重真人、丸山祐市同前鋒尼敦般斯，都奉召代表日本同澳洲去咗踢世盃外圍賽，但係佢哋仲有射手前田遼一同埋後上攻門特醒嘅守衞高橋秀人，小勝水戶並唔係乜嘢難事。