再追多蒙特殺盤

再追多蒙特殺盤

多蒙特在德甲開鑼戰大開殺戒，以四球大斬上季“三哥”慕遜加柏，今季聯賽有個好開始。乘勝追擊，明晨歐霸盃附加賽首回合作客挪威奧特足球會，士氣如虹嘅“蜜蜂軍”有望再大勝一場。

多蒙特大勝慕遜加柏，米希達恩、奧巴美揚及馬高雷斯都發揮出極佳水準，三大攻擊手必然係贏波功臣。不過不得不讚今季新加盟嘅韋基，呢位只得十九歲嘅德國超新星表現相當搶鏡，大家值得留意，來日必成大器，成為歐洲球壇之星。多蒙特只要今場繼續踢出對慕遜加柏嘅八成功力，足以殺敗對手。

奧特會係挪威中上游分子，但對比德甲勁旅多蒙特，無論實力與級數至少差兩班，就算今場佔有天時地利人和，睇怕亦難佔優。初盤多蒙特讓球半／兩球，料“蜜蜂軍”斬兩球或以上。

奧特會由資格賽開始一路過關斬將，當中對手只係同級波，能夠殺到踢附加賽已算係有交代。曾踢過中超嘅尼日利亞外援賓特利，及三名挪威國腳莊臣、森姆爾臣及佐治加利係球隊三線核心，可惜平均戰力一般。今季聯賽十個主場只得三勝五和兩負，主場亦唔惡得去邊，想保住不敗也難。

推介：多蒙特3:0