美國女足「德」天獨厚

美國女足「德」天獨厚
 
女子世界盃打到入去最後4強階段，美國女足同埋德國女足將會高手過招，雖然德國女足嘅世界排名較高，不過美國女足3連勝氣勢勁，加上體力同往績都有壓倒性優勢，捧佢哋開「讓主」一定「德」！（周二2，香港時間周三7:00am開賽）

美國女足喺女子世界排名第2，佢哋由分組賽殺到入4強嘅表現幾乎無可挑剔，首仗以3:1擊敗澳洲，失咗佢哋今屆世界盃第一球，亦係目前為止嘅唯一失球，跟住和瑞典0:0，最後一輪分組賽贏尼日利亞1:0，16強2:0輕取哥倫比亞女足，而8強就以1:0淘汰「鏗鏘玫瑰」中國女足，望落去好似贏好少，但實情係美國全場圍攻中國，如果唔係又中柱又食詐胡，呢場8強戰起碼炒3:0或以上，故此大家唔好以為係魚生粥賽果就睇小美國，特別係佢哋嘅防守力，的確係堅固無比，最重要係淘汰賽階段全部90分鐘搞掂對手，單係體力方面，已經有好大程度嘅著數。
德國女足喺女子球壇世界排名第1，晉級沿途亦不乏大勝場面，包括10:0屠宰科特迪瓦，同埋分組賽最後一輪以4:0擊敗泰國，但要留意上述對手喺女子球壇根本未入流，以科特迪瓦為例，如果唔係外圍賽因對手違例而自動被判贏波，理論上唔可能會出現喺今次決賽周，故此大家唔好被糖衣陷阱蒙蔽。

德女足體力吃虧

德國女足今仗被睇淡皆因氣力同往績輸蝕，8強撼法國要踢到加時兼射12碼，男子足球都消耗體能啦，何況女子足球踢完120分鐘再要遇強隊，加上近6次同美國交手只獲3和3負，唔買美國「讓主」仲等乜？