日本女足摧「蘭」折玉

日本女足摧「蘭」折玉 

鍾意喺女子世界盃睇吓靚女經過聽日朝早之後可能會有啲婉惜，事關荷蘭女足抽中勁旅日本女足，想見多「橙衣軍團」幾面就唔好錯過呢場呢場16強賽事嘞，事關呢一場波可能係呢班美女嘅最後一戰。（周二4，香港時間周三10:00am開賽）
睇番呢班「橙衣軍團」喺A組首戰新西蘭女足係威係勢，雖然當時只係1:0少勝對手，但係當時有勒住而贏嘅感覺，可惜嚟到呢一刻難免要修正呢種睇法，事關打後攻極都攻唔入中國女足搞到輸波，最終更同主辦國加拿大女足踢成平手，只能夠以分組最佳第三名嘅身份殺到入嚟16強，唔似係勒住唔去，而係攻唔得、守唔掂。

日本女足非一人球隊

相反衛冕嘅日本女足就漸入佳境，當然你可以話分組賽3戰都係「僅僅熟」好似冇乜霸氣喎，不過佢哋嘅整體配合比起上屆更有進步，唯一要驚嘅係佢哋喺分組煞科戰冇收起已經36歲嘅主力澤穗希不特止，仲俾佢踢足90分鐘，睇番佢哋比起荷蘭女足仲少一日休息，真係擔心佢哋會回唔切氣，不過呢隊日本並唔係「一人球隊」，要喺90分鐘之內擊敗對手都仲係冇乜問題。