修咸頓讓主好「路」數

修咸頓讓主好「路」數

摩連奴係一個非常實際嘅領隊，佢明白聯賽係打一季唔係打一兩個月，球員體能調配好重要，英超快車期更加冇必要夾硬攞足12分，所以今晚車仔作客修咸頓，摩帥極可能以副選應戰下，心目中攞1分都已經收貨，修咸頓對上一戰已收起數名主力以應付車仔，今場一於冷吼主隊不敗開「讓主」。（周日4，now621台周日10:05pm直播）

摩連奴早就講過，佢無意打造一支全季不敗球隊，最重要係季尾捧起聯賽冠軍，所以佢面對英超內所有強隊都係採取4分政策，即係作客求和主場求贏，如以呢套理念去諗，摩帥喺英超快車期都唔會強求球隊全取12分，而車仔喺上星期先贏史篤城再勝韋斯咸，都係以完整陣容應戰，而佢哋喺2015年第一戰要作客熱刺，呢場對韋斯咸留力機會相當高。
如果車仔真有保留，睇怕都會11人全部替換，當中泰利、尼曼查馬迪、法比加斯、迪亞高哥斯達好有可能一齊避戰，葛特蘇馬、奧斯卡、米基爾、杜奧巴等會正選披甲，跑車當堂變成單車；而相反，修咸頓上一戰已收起雲耶馬、杜辛泰迪治及沙恩朗，擺明想留力同車仔一戰，「聖人」連贏2場氣勢亦佳值得一試。