曼聯讓主橫「素」千軍

曼聯讓主橫「素」千軍
 
上次曼聯作客阿士東維拉失分令到唔少「紅魔鬼」嘅球迷過唔到一個快樂聖誕，不過唔使擔心，今次佢哋改為喺主場迎戰紐卡素，主帥雲高爾應該可以同球迷派番份「讓主」做聖誕禮物嘞！（周五10，now622台周五11:00pm直播）

一度喺英超連開6W嘅曼聯喺上場作客維拉終於失分，不過有跟開「紅魔鬼」嘅球迷都唔會否認佢哋連場勝仗都係冇乜說服力，好似擊敗阿仙奴又或者利物浦一役嘅射門數字用一隻手都數得晒，而後防傷兵過多搞到要用基斯史摩寧、莊尼伊雲斯等人睇實防線，亦令球迷流唔少冷汗，唯一值得高興嘅係前鋒法卡奧取得入波，而龍門迪基亞喺今季終於成材能夠阻止失波。
不過講到近況紐卡素更加係喺谷底徘徊，冇錯佢哋喺10至11月左右的確係踢得唔錯，問題係最近就開始現形，先後不敵阿仙奴、熱刺，甚至係成為埋護緊份子新特蘭嘅手下敗將，最大問題就係龍門位置無論係首席門神告魯爾，定係後備嘅洛艾利洛都要養傷，用到青年軍守龍好難阻止到尹佩斯或者法卡奧開出「讓主」。