里爾下盤執到「堡」

里爾下盤執到「堡」
 
歐霸H組今晚上演次名生死戰，法甲里爾今晚一定要擊敗德甲禾夫斯堡先可以後來居上趕過對手攞到晉級資格，睇番球隊近排主場可以同聖日耳門踢成五五波，實在未必會驚禾堡，受讓值博。（周四17，有線61及201台周五4:05am直播）

里爾分組賽至今一場波都冇贏過得4分，依家3分落後禾夫斯堡，由於首循環雙方踢成1:1，所以里爾其實只要贏波，就可以較佳對賽往績出線，球隊今晚肯定會為3分而戰，戰意唔需要懷疑。
費格然今晚之所以捧里爾，另一原因係先到佢哋月初聯賽主場對巴黎聖日耳門，竟然可以同對手踢成五五波，雖然最終都係得1分，但表現已絕對可嘉，要知道巴黎喺歐聯係同巴塞爭首名出線嘅球隊，級數肯定喺禾堡之上；至於陣容方面，里爾主力好似伊祖沙古爾、奧歷治等都可候命，初盤雖成冷，但有主場而受讓平半，點睇都博得過。

禾堡隱憂比想像多

禾夫斯堡今晚和波都可以晉級，球員踢落應較為輕鬆，只係球隊之前聯賽輸俾史浩克，上輪歐霸更主場輸埋俾愛華頓，似乎對住同級對手冇乜優勢可言。再講，禾夫斯堡雖然有齊奇雲迪布尼、奧歷同賓特拿等球員，但球隊依家喺德甲有機會威脅拜仁，球員或稍為分心，加上首循環佢哋主場都贏唔到里爾僅踢成1:1，今晚和波又足夠出線，真係點睇都唔覺佢哋值得讓到平半，下盤絕對值博。