車路士開大「亭」不了

車路士開大「亭」不了
 
歐聯G組一哥車路士今晚會主場迎戰士砵亭。車仔已肯定出線，而士砵亭雖然和波都得，但造訪史丹福橋一心求和其實同送死冇分別，唔會死守下同拜仁對陸軍場波一樣，都係博「大」着數。（周三7，有線62及202台周四3:45am直播）

車路士喺過去周末聯賽作客對紐卡素時輸咗今季第一場波，依家成班球員肯定一肚火，今戰有埋主場之利自然係搵人出氣良機。再講，車仔喺分組得3勝2和已肯定出線，咁情況下平時少踢球員如雷米、拉美利斯、舒賀爾尼、菲臘路爾斯同埋葛特蘇馬應該都有機會落場證明自己，配合埋法比加斯、韋利安等幫手派牌，戰意同進攻火力都唔使懷疑，「士哥」隨時滾滾而來。

拿尼重生士砵亭火力足

客軍士砵亭有7分喺手，數字上如果和波都可以出線，但正如引言所講，作客史丹福橋一心求和放棄進攻其實同送死冇分別，加埋後衛薛迪列卡度要停賽下，有理由相信士砵亭會一如之前幾輪分組賽打法，照舊火力全開以攻代守，而以曼聯借將拿尼同阿爾及利亞射手施利文尼今季咁Fit計，要喺車仔手上攞個入波亦唔難，有利開「入球騷」。