史浩克贏波“格”

史浩克贏波“格”

德甲明晨有場中游分子對戰，由史浩克主場迎戰奧格斯堡。雙方近七次碰頭，史浩克五勝兩和未輸過畀對手，可以當奧格斯堡係手下敗將，加上本身人腳確實比對方平均得多，只要認真作戰，發揮出正常水準，呢三分應該“依絲執”。

近三場作客全敗，奧格斯堡嘅作客表現真係不敢恭維，甚至季初一場德國盃，被一支地區性聯賽球隊淘汰。到底係本身實力有限，抑或係有作客恐懼症？今戰對住能夠踢到歐冠嘅史浩克，你話實力冇差別就假。初盤史浩克讓半球，奧格斯堡實在難逃“克”運。

雙線發展的確對史浩克有一定影響，何況下周中歐冠要作客對士砵亭。不過，球隊主場相當平穩，至少今季各項賽事仍保持不敗之身。由荷蘭射手亨迪拉亞、喀麥隆國腳祖普莫亭及達斯拿組成嘅攻擊鐵三角，足以破“堡”成功。目前能夠排聯賽第九位，奧格斯堡總算在德甲企得住腳，可惜上季曾被史浩克雙殺，今仗除咗輸質素外，極可能輸埋心理。

推介：史浩克2:0